ចៅក្រមតុលាការសាលាឧទ្ធរណ៍ បានប្រកាសថា ករណីតុលាការខេត្តស្វាយរៀង លើកលែងការចោទប្រកាន់លើលោក ឈូក បណ្ឌិត អតីតអភិបាលក្រុងបាវិត ក្នុងរឿងបាញ់ស្ត្រីកម្មករ ៣ នាក់ ឲ្យរងរបួសធ្ងន់ កាលពីថ្ងៃទី២០កុម្ភៈ ឆ្នាំ២០១២ នឹងត្រូវប្រកាស នៅរសៀលម៉ោង ២ ថ្ងៃទី៤មីនា។ សេចក្តីសម្រេចរបស់ចៅក្រមដូច្នេះ បានធ្វើឡើង បន្ទាប់ពីសវនាការសួរដេញដោលលើសាក្សី ២០ នាក់ ស្ត្រីកម្មករជាជនរងគ្រោះ ៣ នាក់ និងការសាកសួរលោក ឈូក បណ្ឌិត ដែលបានធ្វើឡើង ចាប់តាំងពីព្រឹកថ្ងៃទី២៧កុម្ភៈម្សិលមិញ រហូតដល់រសៀលថ្ងៃទី២៨កុម្ភៈនេះ។
បន្ទាប់ពីស្តាប់សេចក្តីសន្និដ្ឋានពីគ្រប់ភាគី គឺភាគីមេធាវីការពារក្តីជនជាប់ចោទ មេធាវីការពារជនរងគ្រោះ ភាគីព្រះរាជអាជ្ញា ភាគីស្ត្រីកម្មករកាត់ដេររងគ្រោះ និងភាគីជនជាប់ចោទ គឺលោក ឈូក បណ្ឌិត នៅក្នុងសវនាការ នារសៀលថ្ងៃ២៨កុម្ភៈនេះ ចៅក្រមសាលាឧទ្ធរណ៍ បានប្រកាសថា សំណុំរឿងក្តីតុលាការខេត្តស្វាយរៀង លើកលែងការចោទប្រកាន់លើអតីតអភិបាលក្រុងបាវិត លោក ឈូក បណ្ឌិត ក្នុងព្រឹត្តិការណ៍បាញ់ស្ត្រីកម្មករកាត់ដេរ ៣ នាក់ ឲ្យរងរបួសធ្ងន់នោះ នឹងត្រូវប្រកាសនៅរសៀលម៉ោង ២ ថ្ងៃចន្ទ ទី៤ ខែមីនា ឆ្នាំ២០១៣។
សវនាការរយៈពេលពីរថ្ងៃមកនេះ មានការជជែកដេញដោលយ៉ាងច្រើន ដោយមានទាំងសាក្សីដាក់បន្ទុក និងសាក្សីដោះបន្ទុក សរុបរហូតដល់ ២០ នាក់ បានឆ្លើយបំភ្លឺអង្គសវនាការ នៅសាលាឧទ្ធរណ៍ ចាប់តាំងពីថ្ងៃ២៧កុម្ភៈ។
ក្រោយពីការសាកសួរសាក្សី នៅចុងម៉ោង ក្នុងសវនាការនៅព្រឹកមិញ មុនពេលផ្អាកសវនាការ ចៅក្រមបានអនុញ្ញាតឲ្យលោក ឈូក បណ្ឌិត និងសាក្សី ជាប៉ូលិស តទល់គ្នា ដើម្បីដោះសារ និងដាក់បន្ទុក។ សាក្សីជាប៉ូលិសរូបនោះ បានចង្អុលបង្ហាញច្បាស់ថា នៅថ្ងៃកើតហេតុ គឺថ្ងៃទី២០កុម្ភៈ ឆ្នាំ២០១២ លោកបានឮស្នូរកាំភ្លើង ហើយគាត់ឃើញលោក ឈូក បណ្ឌិត កាន់កាំភ្លើង និងមើលទៅម្ខាងទៀត លោកឃើញស្ត្រីកម្មករដួលសន្លប់។
បន្ទាប់ពីសវនាការ លោក ឈូក បណ្ឌិត បដិសេធ មិនឆ្លើយនឹងសំណួររបស់អ្នកកាសែតទេ។ ក៏ប៉ុន្តែតាមការរៀបរាប់ក្នុងសវនាការ លោក ឈូក បណ្ឌិត បានលើកឡើងថា ក្នុងពេលកម្មករធ្វើកូដកម្មនោះ លោកបានកាន់កាំភ្លើងខ្លី បាញ់ឡើងលើ ហើយពេលនោះ ក៏មានការផ្អើល ឆោឡោ ហើយក្រោយមក ក៏មានគេរំដោះលោកចេញពីកន្លែងកើតហេតុ។
យ៉ាងណាក៏ដោយ សកម្មជនសិទ្ធិមនុស្ស លោក អំ សំអាត ដែលបានតាមដានសវនាការ សង្ឃឹមថា សាលាឧទ្ធរណ៍ នឹងធ្វើការវិនិច្ឆ័យ ដើម្បីផ្តល់យុត្តិធម៌ជូនជនរងគ្រោះ ជាកម្មការិនីទាំង ៣ រូបនោះ។
ចំណែកស្ត្រីកម្មករកាត់ដេរ រងគ្រោះទាំង ៣ នាក់ នៅពេលបិទបញ្ចប់សវនាការ បានទាមទារសុំឲ្យតុលាការ ស្វែងរកយុត្តិធម៌ដល់ពួកគាត់ ជាពិសេសស្វែងរកមុខ អ្នកដែលបានបាញ់មកលើគាត់ ដើម្បីផ្តន្ទាទោស ចាប់ដាក់ពន្ធនាគារ។
សូមរម្លឹកថា សាលាឧទ្ធរណ៍ បានលើកយកករណីអតីតអភិបាលក្រុងបាវិត លោក ឈូក បណ្ឌិត ដែលជាប់ចោទរឿងបាញ់ស្ត្រីកម្មករកាត់ដេរ ៣ នាក់ ឲ្យរបួសធ្ងន់ មកជំនុំជម្រះឡើងវិញ ចាប់តាំងពីព្រឹកថ្ងៃទី២៧ ខែកុម្ភៈ រហូតដល់រសៀលថ្ងៃ២៨កុម្ភៈ។
សំណុំរឿងក្តីនោះ កាលខែធ្នូ ឆ្នាំ២០១២ ត្រូវបានព្រះរាជអាជ្ញា តុលាការខេត្តស្វាយរៀង សំរេចលើកលែងការចោទប្រកាន់លើលោក ឈូក បណ្ឌិត ដោយសំអាងថា មិនមានភស្តុតាងគ្រប់គ្រាន់។ ក៏ប៉ុន្តែសកម្មជនសិទ្ធិមនុស្ស និងក្រុមស្ត្រីកម្មករកាត់ដេររងគ្រោះ បានជំទាស់ ហើយក្រោយមកក៏បានប្តឹងឡើងមកកាន់សាលាឧទ្ធរណ៍៕
